... تنبية هام للمسافريين ع طريق مصر اسكندرية الزراعى ...


للمسافرين عبر طريق مصر اسكندرية الزراعي .. دي شوية نصايح عشان تقلل عدد ساعات التوهان والمخاطر في الطريق ده .. وده للي بيسافر أول مرة .. اللي سافر قبل كده من الطريق ده عارف انا بقول ايه ..

- خد بالك الطريق بقى أنيل من الأول .. عربيتك مش هتمشي زي ما بتمشي في الطرق العادية .. لأ .. هتلاقيها بتتنطط .. عشان الأسفلت مدغدغ وفيه نتوءات وانبعاجات واختناقات وشقلباظات .. و العلامات اللي كانت بتحذرك من وجود مطبات بعد 100 متر بقت محطوطة بعد المطبات بــ 100 متر .. يعني تلبس المطب و تبتدي تشوف العلامة بتقول ايه .. فبالراحه يا برنس ..

- طول ما انت ماشي هتلاقي يــُـفط وعلامات مكتوب عليها (لسلامتك .. افحص سيارتك قبل السفر) .. وتحت العلامة هتلاقي عربية مدغدغة ومدعوكة دعك السنين .. بعديها بشوية هتلاقي عربية تانية متهربدة وواحد بيركب نفس اليافطة فوقيها .. الموضوع مش صدفة .. افحص عربيتك .. افحص يا حبيبي .. افحص يا بابا .. افحص لأغزك ..

- متطلعش ولا كوبري .. حتى لو صح .. الكباري خطر قاتل .. و بتوديك محافظات وكفور ونجوع تانية .. خليك عالأرض احسن .. حتى لو السكة مش صح ..

- اسمع كلامي في النقطة دي بالذات .. لو وصلت لمفترق طرق - بيتفرع لخمس اتجاهات مثلاً - اوعى تبص عالاسهم .. هتحتاج يومين عشان تفسرها .. خد يمينك علطول .. ولو تُهت .. ارجع تاني وخد الشمال ..

- افتكر أنك مش انت لوحدك في الطريق .. هتلاقي معاك فسبا وعجل وتكاتيك .. وبقى في وسيلة مواصلات عجيبة قوي عبارة عن ربع نقل بتلات عجلات بدل أربعة (مش فاهم ايه الحكمة) .. المهم متشدش مع أي حاجه فيهم لأنهم هيسبقوك حتى لو انت ماشي على 170 (برضه مش عارف ازاي) ..

- لو فيه فتحة عايز تلف منها و رحت مفوّتها لأي سبب .. ارجع بالعربية لورا ولف منها .. لأنك لو اخدت الفتحة اللي بعدها - مع انها على نفس الطريق - هتلاقي نفسك في مكان تاني خالص .. صدقني .. قوانين الفيزياء والطبيعة بتيجي لحد مصر اسكندرية الزراعي وتخرف..

- لو تُهت انزل واسأل .. واللي هيوصفلك الطريق خليه يوصفهولك تاني .. لانه غالبا بتلاقي الوصف التاني غير الاولاني تماماً .. مع انه نفس الشخص ..

- الصنف الوحيد اللي متسألوش على السكة لو تهت همه السواقين اللي بيركنوا مقطوراتهم وبيعملوها على جنب .. متسألوش وهو بيمارس هذا النشاط .. لأنه في الغالب بيلف لك بعفوية ويجاوبك .. وساعتها هتندم ندم السنين ..

- لو ماشي بسرعة رهيبة والدنيا كحل ولقيت العربيات اللي قدامك كسرت شمال او يمين مرة واحدة .. اكسر معاهم من غير ما تفكر .. اكسر وبعدين يبقى أسأل همه كسروا ليه..

- لو لقيت مرة واحدة تريلا في وشك .. يبقى انت مكسرتش مع العربيات اللي كسرت زي ما قلتلك ..

- مصر اسكندرية الزراعي مختلف عن كل الطرق التانية .. التريلات والمقطورات هي اللي بتاخد غرز من الملاكي .. مش العكس .. فامشي على مهلك خالص خالص ومتحاولش تسرع إلاّ لما تلاقي العربيات بتقرب منك وبتشتمك شتايم أبيحة قوي قوي .. (مش بس أبيحة) .. لأ لازم تكون أبيحة أوي أوي ..


- لو ماشي على 140 ولقيت مقطورة جايه في وشك متتخضش .. ومتكسرش شمال ولا يمين .. خليك ماشي في طريقك و هو هيعرف يفاديك ازاي ويعدي منك .. همه متدربين على كده .. لو لقيته لسه بيقرب منك ارعش له .. لو لقيته برضه بيقرب منك وخلاص هيفعصك .. ابتدي اقلق ..


- الطريق مفيهوش بلطجية ولا قطاع طرق بيثبتوا العربيات زي ما هو شائع .. وده لأن كل اللي ماشيين جنبك همه نفسهم قطاع الطرق والبلطجية والمدمنين اللي نازلين القاهرة يمارسوا نشاطهم الاعتيادي ويرجعوا تاني .. فسوق وانت مطمن ..

و دي كانت نصايح بسيطة للمسافرين عبر طريق مصر – اسكندرية الزراعي .. وفيما عدا كل اللي فات فالطريق كله أمان يا برنس .. وتقدر تسافر وانت مستريح ..

قشطــه يا اندروا^^