الموقع العربي الاول للعبة Silkroad Online

النظام القمعي الفاسد : مجموعة اكياس زبالة مرمية في الشارع ومخليه منظر الشارع مقزز .

المنافقون : ناس بتتغزل في جمال وحلاوة الزبالة ... والنظام المدهش اللي الزبالة مرمية بيه في الشارع .

اعلام النظام : مجموعة من الناس واخدة على عاتقها تجميل شكل الزبالة واظهارها بمظهر اقل قذارة ... فبدل ما كل الاكياس سوده مثلا .. يخلو مجموعة منها خضرا ... والزبالة بدل ما هي مرمية بعشوائية في الشارع بيتعاد تنظيمها وتترمي برضه في الشارع بس بشكل اظرف .

المنتفعين : مجموعة من الدبان اللي بيحب يتلم على الزبالة .

الديمقراطية : حرية رمي الزبالة في المكان اللي انت عاوزه .

التغيير : تبديل مجموعة من اكياس الزبالة واستبدالها باكياس تانية ...بحيث ان الزبالة تكون موجوده آه بس يتغير مكانها ويتعاد توزيعها .

التوريث : تفتح كيس زبالة كبير .. وتاخد منه شوية زباله تحطهم في كيس اصغر وتشيل الكيس الكبير وتحط مكانه الكيس الصغير .

الاصلاحات : ازالة مجموعة كبيرة من اكياس الزبالة وترك مجموعة اكبر .

الثورة : مجموعة من الناس شافو منظر الشارع وهو متلوث ... فاتفقو انهم يشيلو الاكياس دي كلها ويحاولو ينضفو الشارع .

القمع : مجموعة من الكلاب اللي كانت بتتغذى على الزبالة اول ماشافت الناس جاية تشيلها هجمت عليها وحاولت تطاردها وتقضي عليها.

مجموعة محبي النظام : مجموعة ناس كانت مبتحبش تعيش غير في الزبالة وأول ما حست إن الشارع هينضف زعلو جدا واتمنو ان الزباله ترجع الشارع تاني .

وفي النهاية لازم الثوار يخلو عنيهم مفتحةعلى الشارع عشان محدش يرمي زبالة تاني ... اي نعم محدش يقدر يقول ان كل اكياس الزبالة اللي كانت مرمية في الشارع تم التخلص منها ... اكيد في اكياس كتيرة لسه موجودة ... لكن كويس اصلا ان فيه ناس فكرت انها تتخلص من الزبالة .