|
زيتونة الربح من الانترنت "عشان نفهم"
السلام عليك
بكل بساطه نجيب اخرة الربح من الانترننت عشان الناس كلها تفهم الموضوع ده مش تشجيع لاي حاجه ولا اعلان عن اي حاجه عايزين الناس تفهم مش اكتر قصة الربح من الانترنت من قديم الازل و رسائل الاعلانات كانت بتيجي اعلانات عن الربح من الانترنت و و المنتديات خصوصا و كنا بنسمع كلام خيالي 100 دولار في اسبوع و كلام كده فلكي الموضوع ابتدى جديا سنة 2005 او ده كان اول معرفته بالنسبه ليه و كان بداية انتشاره برده نبتدي بالبنوك الالكترونية البنوك الالكترونية دي هي بنوك عالمية و عادية خالص ليها اماكن رسمية في بلاد مشهورة و زيه زي البنك ال ف مصر عندك هنا بس الفرق انك بتبقى حاطط حسابك بكره و كل حاجه متاحه تسحب او تعمل وديعه او تشتري منتجات او تعمل تحويل لحسابات تانية واشهر البنوك البنك الاخضر aletpay و ده بنك مشهور جدا بسهولة التحويل منه و اليه و دعمه لشراء كثير من المنتجات من على شبكة الانترنت و الحد الادني لاي تحويل 1$ و بياخد عموله طبعا 1% و ممكن تعمل حساب و بيكون مفعل في خلال 10 الى 20 يوم بعد ما تتبع التعليمات بشرط يكون معاك بطاقة طبعا و سعر الدولار في البنك ده بتبقى في حدود 4.5 الى 5.25 جنيه عشان البنك ده لو جيت تسحب من عليه لحسابك في اي بنك مصري مثلا هياخد منك 15 دولار رسوم تحويل + النسبة فعشان كده سعر الدولار بيقل في البنك ده Libertyresreve ده بقه بنك مزيكا لا بطاقه ولا تفعيل ولا حد ادنى للتحويل بنك كويس جدا و كتير برده من المواقع بتدعمه و ممكن تعمل تحويلات لاي بنك في مصر بعموله اقل و سعره بيبقى في حدود 5.5 الى 6 جنيه بياخد عموله واحد ف الميه بحد ادنى واحد سنت للعموله في التحويل paypal البنك ده بقى ناس كتير بتفتي فيه والله اعلم بيه بس المفيد التجربة بتاعتي معاه فانا مش بخترع البنك ده مش بيتعامل مع البنوك المصريه ... فبالتالي هوه بيشوف اي حد عنوانه مصر مش بيرضى يفعله حسابه كنت سمعت قبل كده حوارات تفعيل بفيزا دوليه و كلام كتير لبخ كده بس كان كلام مقلق بالنسبالي ووصلت في اخرها ان الفلوس بتوصلني على الحساب ال انا عملته بكل سهوله بس معرفش اصرف منهم ولا مليم عشان حسابي غير مفعل البنك ده كان بيدعم الهند فعملت فيها هندي و سجلت فيه بحساب تاني و الحساب اشتغل معايا كويس و لحد النهارده شغال من 3 سنين بس في ناس كتير برده من ال عملت الطريقه دي جالها حجر على حسابها بعد فتره بس انا بصراحه مش جالي دول يعتبروا اهم 3 بنوك في بعد كده بنوك تانيه بس ملهاش لازمه قد كده مفيش حاجات كتير بتدعمها فبالتالي انت مش هتحتاجها عشان تشتري حاجه اكيد انت تهت .... المقدمه ال ف الاول دي عشان تفهم قصة البنوك الالكترونية و تقدر تشحن الحسابات دي من واحد زي gogo ال هنا في المنتدى و بتهيالي هوه اول واحد نزل الخدمه دي في المنتدى و كمان على فكره كان بيشحنلي رصيد مقابل $$ من على حساباتي يتبع |
بالنسبه للربح من الانترنت نفسه
ليه انواع كتير هنبدا بالابسط شركات البكس دي شركات بتشترك فيها كل اي بي له اشتراك واحد بس و بيوريك شوية اعلانات غالبا بيكونو من اربع لست اعلانات عمرك ما هتاخد على السته اكتر من سته سنت لو بتاخد اكتر من كده تبقى الشركه دي نصابه و ممكن تكون حتى بتاخد كده و اقل من كده و تكون بتنصب عادي الشركات دي كل يوم تطلع واحده جديده تشتغل شوية و بعدين تاخد الفلوس و تخلع او متقدرش تدفع مثلا و في حاجه اسمها الحد الادنى للسحب يعني مثلا متقدرش تسحب من الشركه الا لما يبقى معاك 1 دولار فاحسبها انت بقى مثلا عايزلك بتاع 17 يوم على الاقل عشان تجمع الحد الادنى و خد بالك المواصفات ال انا بقولها دي ولا في الاحلام و نادرا لما تلاقي شركه بتدفع بالمواصفات دي و عاجلا ام اجلا هتنصب على الناس او هتفلس و شركات البكس دي بتنصب بين يوم و ليله يعني ممكن انا اسحب النهارده و انت تيجي تسحب بكره متدفعلكش من الاخر الحوار ده 700% فاشل و لو خدت منه فلوس هتاخد ملاليم ملهاش اي قيمة مقابل المده الزمنية في ناس بتقعد بالشهر عشان تجيب خمسه سته دولار يعني بتاع تلاتين جنيه و شركات نادره ال شغاله من زمان تاني حاجه في الربح من الانترنت شركات العروض شركات العروض دي بتتكون ازاي انا عندي موقع و عايز اعمله دعايه اروح لشركه العروض دي و اقولهم انا عايز مثلا 500 واحد يسجلو عندي في الموقع بتاعي و هدفع على كل واحد 20 سنت يقوم الشركه عامله عرض عندها ال يسجل في الموقع تديله 10 سنت و الليله ماشيه كده بقه و برده شركات نادره ال مازالت مستمره من زمان تالت حاجه شركات الهايب تعرفوا حاجه اسمها ربى ؟؟ هوه ده الربى بعينه ...شركات استثمار بارباح ثابته او بمعنى تاني يمين شمال مفيش خساره ودي النصب فيها على ودنو الليله ماشيه كالتالي اولا مفيش شركه استمرت اكتر من خمس سنين شغاله يا اما تفلس يا اما تنصب الشركات دي نوعين وليها نوع تالت كده بس مش هنكلم عنه عشان طويل و ملوش لازمه الشركات ال بتفلس ال هيه الشركات ال بيبقى ارباحها صغيره زي مثلا 2 في الميه يوميا و دي بتفضل شغاله طول ما استثماراتها شغاله تمام لحد ما يحصل اي ظروف اقتصاديه تخسر راس مالها تفلس تنصب على الناس و تخلع في شركات بقه ال هيه كل يوم بتطلع جديده و دي حاجه اخر دلع هقولكم على الموضوع بتجربه بسيطه شركه جديده فتحت النهارده استثمرت فيها 5 دولار وهيه بتدفع 150% على اقساط كل يوم 30 في الميه الشركه دي دفعتلي اول خمس ايام و مرضتش استثمر فيها تاني ناس استثمرت فيها ونصبت بعدها 8 ايام عمل نفس صاحبها (وده ال اكتشفناه بعد كده) عمل شركه تانيه و بيدفع 25% كل يوم لمدة خمس ايام و ودفع اول خمس ايام و بعد كده نصب تاني يوم فتح شركه جديده و عملها بنفس برنامج ال قبلها بس المره دي دفع تلات ايام بس و خلع عارف ده عمل ايه لم اول يوم 5000 دولار من الناس بكره هيدفعهلم 25% من فلوسهم و هيتبقى معاه 75% و قول لما الناس دي تجيب اثباتات الدفع و توريها للناس التانيه تقوم الناس التانيه مستثمره في الشركه يعني قول 3750 دولار الباقي من اجمالي استثمارات اول ايوم + 3000 استثمارت جديده لتاني يوم في عمر الشركه =6750 دولار تالت يوم في عمر الشركه هيدفع 2000 دولار ارباح للناس من فلوسهم + هيتشهر زياده هيوصل استثماره ل 6 الاف تالت يوم و الناس تثق فيه يبقى الاجمالي ال معاه 10000 بتهيالي مبلغ مغري اوي لدرجه انه يقول يا فكيك و ينصب على الناس و يخلع الموال ده له سياساته بس يمين شمال حرام ,,,و الحرام وحش ده ربى ميه في الميه ....متديش لحد فرصه يتناقش معاك في كده اساسا المفيد بتاعها ان المفروض اصحاب الشركات دي بيبرروا المكاسب الكبيره بحجة انهم بيستثمروا اموالهم في الفوركس و بيكسبوا كويس |
من انواع الربح من الانترنت
الكوماندوز بتاع الربح الفوركس ودي حاجه اشبه بالبورصه الا انها ملهاش اماكن ثابته يمعنى انها كلها بتتم عن طريق وسائل الانصالات و معنى الفوركس هي سوق العملات : يتم يوميا مئات العمليات من التداولات المالية بين دول العالم في عمليات البيع و الشراء و الاستيراد والتصدير و العلميات دي بتتم عن طريق البنوك في جميع انحاء العالم و عن طريق البورصه او اي تعامل بيتدخل فيه تغيير العملات و ده بيشمل ان مثلا شركه استيرات استورده كمبيوترات من امريكا المستورد دفع للمصدر عن طريق البنك الاهلي المصري خمسه و عشرين مليون جنيه تمن الصفقه على حساب المصدر في البنك ولنفرتش مثلا البنك الامريكي يقوم البنك الاهلي المصري يشوف حد من اصحاب الاموال في الفوركس يقوله انا معايا ما يعادل خمسه مليون دولار بس بالجنيه عايز احولهم هيقولك سعر بيع الدولار خمسه جنيه و سعر ال الشخص اساسا ده شاري بيه 4.5 لانه مثلا كان شاري من فتره الدولار ايامها كان رخيص عشان متوقع ان الدولار هيغلى بيقوله طيب ماشي بيديله خمسه و عشرين مليون جنيه يقوم الفوركس محوله لحساب البنك الامريكي و تمت العمليه بمكسب نص جنيه عن كل دولار يعني المكسب الفرق بين سعر شراء العمله و سعير بيعها راس مال الفوركس عباره عن مجموع راس مال المشاركين فيها حد فاهم حاجه !!! انا عارف انها صعبه طبعا العملية بتتم بديناميكة غير كده خالص بس انا حاولت ابسطها و دي وظيفه بتدرس و بتعتمد على الخبره و الحظ زي التغييرات الاقتصادية و السياسية لانها بتعتمد على كمية التعاملات اليومية للعملات هيه دي مجالات الربح من الانترنت المتاحه ال الناس دايما بتحاول تعلن عنها في اضافه بس بالنسبة لشركات البكس ال حاجه الوحيده ال تخليك تبقى ناجح فيها انك تخلي ناس كتير تسجل في الشركه عن طريقك فيتحسبلك نسبه من ارباحهم فارباحك تزيد بسرعه فتوصل للحد الادنى اسرع فتلحق تسحب لو الشركه لسه مش نصبت يعني من الاخر عشان كده دايما بنشوف الناس ال شغاله ف المجال ده بتحاول تقنع الناس ال مش شغاله فيه بتهيالي انا لميت الموضوع تقريبا كله ولو في حاجه ناقصه هحاول اضيفها وكل كلمه كتبتها هنا بناء على خبره حقيقية و كتبت الموضوع بايدي كلمه كلمه طبعا فحرام يعني انه يتنقل او حتى يقتبس و الغرض منه المعرفه العامه للكل عشان النس متتسوحش ورا اي حد يقول اي كلام وبامانه الموضوع برمته فاشل نسبيا اخرك شوية ملاليم لو نجحت يعني و السلام ختام |
بجد كلامك جميل ومنطقى جدا شكرا على المجهود الرائع
|
| الساعة الآن 10:46 PM. |
Powered by vBulletin® Version 3.8.11
Copyright ©2000 - 2026, vBulletin Solutions, Inc.