الموقع العربي الاول للعبة Silkroad Online - إرقـوني...أصـل النـاس حـسدونـي

الحسد..كلمة ذكرت في القرآن الكريم
ولكن في الفترة الاخيرة لاحظت عبارة بتردد كتير وانتشرت بصورة غريبة وهي"اصل انا اتحسدت"
بقى دلوقتى كل لما حد يحصله حاجه "يقول اصلا انا محسود"
بقت طريقة تفكيرنا غريبة شويتين لدرجه نسينا فيها ان هناك
"قدر" ... وده ركن مهم من" أركان الايمان "
ونسينا او تناسينا كلمه مهمه..الا وهيا"الابتلاء "

الانسان مننا ممكن تحصله حاجه ربنا كتبها ولازم تحصله فى وقت معين وبطريقه معينه علشان يعلمه منها حاجه معينه
ومش منطقي ابدا ان كل لما حد يبدى لنا اعجابه بحاجه تخصنا انه بكدا يبقى بيحسدنا

وانا برجع تانى واقول ان مش معنى كده ان مافيش حاجه اسمها حسد لأ طبعا .. الحسد موجود بس فى مقوله بتقول
"ربنا يسبب الاسباب"

يعنى هقولكوا حكايه حصلت معايا وده على سبيل المثال
بنوته بتحكيلى انها لسه متزوجه جديد وحاسه انها محسوده
قلت لها : ليه عندك الاحساس ده
قالت لى : ان فى يوم من الايام جالي ناس عشان يباركوا لي..وانا بقدملهم العصيراتكعبلت وقعت ..ومش بس كده انا اتعورت وانجرحت وكان الجرح على شكل عين!
بالله عليكوا ده كلام ناس عاقلين
قلت لها : انتى بتصلى
قالت: اه
قلت: طيب انتى بتسبحى وتقراى المعوذتين والاخلاص وايه الكرسى بعد كل صلاه ..وبتقرأى اذكار الصباح والمساء ... يوميا بعد صلاه العصر والفجر
قالت: اه
قلت : طيب انتى لما بتحسى ان فى حدممكن تكون عينه وحشه وممكن يحسدك ...بتعملى ايه
قالت: بقرأ المعوذتين فى سرى من غير ما حد يلاحظ علشان ما احرجهوش
قلت لها: طب تعرفى اركان الايمان ؟
قالت :اه اعرفها وهى الايمان بالله..وملائكته ..وكتبه ..ورسله ..وباليوم الاخر .. وبالقدر
قلت لها : بالله عليكى ازاي بتحصنى نفسك يوميا من الانس والجان ..وبعد كده تقولى انك محسوده.. انتى ما تعرفيش ان المحافظه على الصلوات وخاصه صلاه الفجر وقراءه الاذكار وقراءه المعوذتين وايه الكرسى تحميكى من شر الانس والجن
ده حصن المسلم المؤمن بأركان الايمان وبالقدر

في الاخر سألت نفسي
كيف لنا أن نتوكل على الله يوميا وفى النهايه لا نطبق هذا الكلام ..فالإيمان بالله ليس فقط باللسان
ولكن بالقلب والعقل وكل جوارحنا ويكون فى تصرفتنا .. فلازم نؤمن بالقدر خيره وشره
ومش كل لما يحصلنا حاجه نقول اصلنا اتحسدنا ..

ومهم جدا اننا نفرق بين كلمتين ناس كتير بتتلغبط فى معناهم وهما
" الحسد" ... " الغبطه "
" الحسد " : هو ان يتمنى الشخص زوال هذه النعمه منك
" الغبطه " :هو ان يتمنى ان يكون الشخص مثلك ولكن مع مباركه ما عندك
" بمعنى لا يتمنى زوالها منك "

بالله عليكوا مش كل لما يحصلنا حاجه سواء فى ممتلكتنا الشخصيه او فى اولادنا او فى بيوتنا او حتى فى شغلك او عربيتك نقول اصلنا اتحسدنا

لازم نراجع نفسنا ونشوف حكمه ربنا فى اللى بيحصلنا ..ممكن يكون تقصير مننا فى عباده الله او تقصير فى حق شخص ما او ..ربنا عمل كده معانا علشان يعلمنا شيئ معين تايه عننا

وفى النهايه لو كل حاجه وضعناها فى حيز الحسد.....
يبقى الامه العربيه يا عينى اللى بيحصلها ده كله لانها محسوده ..وتناسينا السبب الاساسى فى الحاله اللى وصلنالها ... وهى بعدنا عن ربنا سواء مسلمين او مسيحيين ....

ويبقى برده اللى بيحصل فى المسجد الاقصى والتراث الاسلامى او المسيحيى اللى بيروح مننا امام اعيننا جميعا ليس لان العرب حكومه وشعب اصبحوا سلبيين وبقت اهم حاجه عندنا مصالحنا الشخصيه والماديه

وكل واحد مننا دلوقتى بيقول يالا نفسى ثم نفسى ثم نفسى
لأ طبعا كل الكلام ده غلط وكل اللى بيحصل ده ياعينى علشان احنا محسودين

ربنا يهدينا وينور بصيرتنا ونفوق من الغيبوبه "كويكلي كويكلي"
عشان مافيش وقت