|
فايدة العملة المعدنية فى مصر
بسم الله الرحمن الرحيم
والصلاة والسلام على أشرف المرسلين وعلى آله وصحبه أجمعين , تحية عطرة طيبة إليكم جميعا , وبعد ,,, بدون مقدمات وإطالة ... مين فينا معجب بعملة الجنيه المعدنية ومغرم بيها ؟؟؟ أكيد الغالبية الساحقة منا بتكرهها كره العمى , وأنا أولكم .. أولا لأنها ثقيلة , ثانيا لأنها بتاخد مكان , ثالثا لأنها بتضيع وتقع بكل سهولة .. والكل بيقول ان الحكومة مش عارفة تزهقنا فى حياتنا بأى طريقة , قامت عملت لنا العملة دى ... وناس تانية قالت ده مؤشر على انحطاط قيمة عملتنا ... واننا رجعنا لعصر " صرة من الدنانير " لكن بجد احنا نستااااااهل أكتر من كده , دول لو عملوا لنا جنيه خرسانة يبقى حلال فينا ... محدش يزعل ... تعالى أشرحلك ... أنا فى أغلب الأوقات كان بيوصلنى عملات ورقية من فئة الربع جنيه إلى الخمسة جنيه , وفيها حروق غريبة , وكنت معتقد انها نتيجة سقوط طفى البخور عليها !!! لكن مع زيادة ورود العملات دى عليا استغربت , وسألت نفسى " هو الشعب كله بيولع بخور ويحط تحته فلوس ولا إيه !!!" . لغاية ما فى يوم عرفت الحقيقة المرة ... الحروق دى نتيجة المخدرات !!! سائق ميكروباص قالى " يا بيه دى خروم عشان الحشيش ... بيفردوا وينفخوا الحشيش عليه " قولت يا نهااااار أبيض !!! معنى كده ان مدمنين الحشيش كتير فى البلد !!! لكن ده مش موضوعنا دلوقتى انت دلوقتى بتقولى " وأنا مالى ؟؟؟ أنا عمر ما قربت من المخدرات .. إيه ذنبى ؟؟ " أقولك " استنانى بس "... فيه ناس كتير تانية شوفتها كاتبة قصائد شعر كاملة على الجنيهات , واللى كاتب اسمه ورقم تليفونه , واللى كاتب اسم حبيبته .. وغيره اللى بيقطع الفلوس ويعملها طيارة , أو يسلك بيها سنانه , أو حتى يكرمشها فى جيبه زى القنفد , أو يطبقها تطبيقة غريبة فى المحفظة ... عايز تقولى انك معملتش أى حاجة من دول ؟؟؟ عايز تقولى ان لو جالك جنيه مقطوع منه جزء صغير هاتلصقه ؟؟ ولو فيه جزء مثنى هاتفرده ؟؟؟ الحكومة لقيت ان النقود الورقية بتخسرها كتير ... المفروض ان عمرها الافتراضى 6 سنين , لكن للأسف معانا احنا , ربنا مابيقويهاش إلا سنتين اثنين بس , ويعدين يجيلها السكر والضغط زى المواطن المصر بالضبط , ولما السكر يعلى عليها , يبترولها جزء ويمكن يكون فيه رقمين ... حتى ان الأبحاث اللى عملوها على العملات الورقية فى مصر , أثبتت ان العملات الورقية المصرية وسيط جيد جدا لنقل الأمراض البكتيرية والفطرية !!! قامت الحكومة اللى قلبها على صحة المواطن وميزانية الدولة قالت " لازم نحول الورق لمعدن , أهو أرخص وأوفر وصحى أكثر " . وده فعلا حل صائب تماما ... فيه أوضاع كتييييير احنا غلطانين فيها , غلطانين فى حق أنفسنا قبل حق الآخرين , ونستاهل كل اللى يجرى لنا ... مش كدا ولا إييييه ؟؟؟!!! |
يا خبر ابيض طيب لما الحكومة تلغى الفلوس الورق احنا هنرول على اية
يا خسارة بس مش مهم هنتصرف هنتصرف وزى ما الجيش بيقول (الجيش بيقولك اتصرف ) مشكور يا مان على موضوعك |
انا افتكرت هما عملوها علشان يشغلو تلاجات بيبسى اللى بتحط فيها الفلوس و يطلع حاجة سائعة بس شكلى كنت بخمن غلط خالص
|
اقتباس:
|
اقتباس:
|
كلام زى الصح يا اخى
|
ههههههههههههههههههه تلاجات البيبسى اه
بجنية ده على اساس انهم عبط يعنى يخلى الكانز ابو 2 جنية بى جنية |
انا افتكرت عشان ينشرو ال جنية المصرى فى كل انحاء اوروبا
اصل الاوروبيون بيحبوا العملات المعدنية عشان الدولار و اليورو سحن على ايدهم اوى |
موضوع جميل مشكور بس برده ميخفيش ان العمله بتعتنه بتتدهور وربنا بيسهل اهو بنرجع لوره لحد منرجع لنظام المقايضه بدل البايبال
مشكور |
والله كلام جميل بس لما بتروح لاى حد و تدفعله " صرة من الدنانير " اقصد 5 جنيه معدن او كده..يرميك بنظره غريبه كده و يقول..ماباخودش غير ورق..
|
اقتباس:
|
على فكره انت كلامك صح
المعدن اوفر و ارخص وبيدوم لفتره طويله |
هو الاتحاد الاوروبى احسن مننا فى ايه ما هم بيستخدموا اليورو
|
مشكور وفعلا انا اساسا بحب العمله ده
|
والله كلامك صح بس ده برده دليل علي انا العمله المصريه بقت في الحضيض................... صح ولا ايه ؟؟
|
| الساعة الآن 12:27 AM. |
Powered by vBulletin® Version 3.8.11
Copyright ©2000 - 2025, vBulletin Solutions, Inc.