|
نشرة S4a التقنيه 26-9
#نشرةs4a 📰
🌟انت مش لوحدك.. موبايلات آيفون ألوان شاشتها بهتت مع iOS 12 :O مستخدمين كتير اشتكو من بهتان ألون شاشات موبايلاتهم الآيفون وخصوصا الآيفون اكس!! المشكلة بدأت اول ما عملوا ابديت لنظام تشغيل أبل الجديد، وفيه توقعات كتيرة بتقول ان تحديثات في طريقة عرض الألوان اتغيرت عشان كان فيه مشاكل مع آيفون اكس وشاشته الـOLED في دقة وضوح الكلام على الألوان، فتقريبا كدا أبل حلت مشكلة وضوح الكلام ببهتان الألوان! أبل معلقتش ع الموضوع لحد دلوقت! 🌟الاتنين المؤسسين لانستجرام استقالوا امبارح من فيسبوك خلاص! السبب انهم محتاجين يرتاحوا ويكبروا دماغهم شوية لإنهم بيحضروا لمنتج جديد هينزلوا بيه السوق قريب :O بالمناسبة الاستقالة دي تعتبر الضربة التانية السنة دي لفيبوك بعد ما استقال جان كوم آخر مؤسسي واتساب اللي كان لسا جوا فيسبوك.. أعتقد كدا مؤسسي واتساب وانستجرام هيبدأوا يخلقوا حالة تنافس فيسبوك من جديد.. والسوق هيحلو أوي بقى! 🌟خدمة Ancestry لتحليل حمضك النووي اتعاونت مع Spotify عشان تخليك تقدر تاخد ليستة أغانية معمولة عشانك حسب طبيعة جيناتك الوراثية :D 🌟شركة ميتسوبيشي للعربيات استدعت 68000 عربية من الموديلات دي 2018 Eclipse Cross و 2018 Outlanderو2018 Outlander Sport بسبب مشكلة في برمجة نظام التحكم الإلكتروني الخاص بالفرامل! 🌟فريق باحثين قدر انه يوصل لنظام الكتروني ذكي بيقدر يتعرف على هويتك من خلال حركة عينك وانت بتقرا أي نص مكتوب، وده من خلال تحديد نقط ومسارات مميزة بتعملها عينك وهي بتتحرك خلال قراءة أي نص وأي كلمة! الباحثين من جامعة Postdam Uni ومعهد Weizenbaum Institute for the Networked Society ومعهد Leibniz Institute for Agricultural Engineering and Bioeconomy وتقدر تعرف أكتر عنها من هنا " https://goo.gl/pJkBgc " 🌟خطوط طيران آلاسكا اتعاونت مع شركة Skylights عشان تقدم تجربة VR على متن رحلاتها في الجو :D بالمناسبة خطوط الطيران الإماراتية بتقدم نفس الخدمة دي مع نفس الشركة برضو في الدرجة الأولى من رحلاتها ;) 🌟فيسبوك مرفوع عليه قضية من واحدة من مراجعي المحتوى بسبب اصابتها بمشاكل عقلية بسبب الصور والفيديو البشعة اللي بتشوفها بعد ما بيبلغ عنها المستخدمين انها محتوى مزعج، وبتتهم في القضية فيسبوك انه مبيهتمش بحالة المراجعين النفسية أبدًا ! 🌟أستراليا على حافة قرار جديد هيقلب وضع الأمن المعلوماتي والخصوصية على موبايلات المستخدمين، لإن وزير الشؤون الداخلية Peter Dutton بيدور حاليا في مشروع قرار جديد يجبر كل الشركات التقنية ومصنعي الهواتف والأجهزة الذكية انهم يلتزموا بأي طلبات حكومية أمنية خاصة بإنهم يحطوا في أجهزتهم تطبيقات خفية تراقب استخدام المستخدمين لأجهزتهم أو كمان تطبيقات تلقط سكرين شوت لشاشة الجهاز بدون علم المستخدم! 🌟جوجل وعملاق البحث الروسي Yandex وامبراطورية خدمات الانترنت Mail.ru شغالين مع الدرع الروسي لرقابة الانترنت Roskomnadzor على سيستم جديد متخزن فيه جميع الأفلام والبرامج والتطبيقات والبرمجيات وأي محتوى مسروق مرفوع على الانترنت، بحث ان قاعدة البيانات دي تتحدث كل 5 دقايق وأي من المشاركين فيها يقدروا انهم ياخدوا نسخة منها بحيث يمسحوا أي محتوى عليه حقوق ملكية خلال حد أقصى 6 ساعات.. من غير ما يبقى فيه أمر قضائي مع اللي مقدم الطلب ان المحتوى يتمسح! فيه مشروع مشابه الاتحاد الاوروبي شغال عليه وتقدر تعرف عنه أكتر من هنا (( https://goo.gl/j2xHrZ )) 🌟عتاولة السوق من جوجل ومايكروسوفت وأبل وفيسبوك وأمازون صرفوا 80 مليار دولار السنة اللي فاتت في مصانعهم ومواردهم الدايمة والصناعات التقيلة وصناعة السينسورز...!!! متتصدمش عادي، جوجل لوحدها صارفة 20 مليار دولار على تطوير سينسورز الليزر عشان تخلي عربياتها Waymo دقيقى في الحركة، ودي مصاريف سنة واحدة بس على بند صغير! 🌟شركة اختبار الشاشات الشهيرة DisplayMate قالت ان موبايل آيفون XS Max عنده أفضل شاشة في السوق (هتنزل تفاصيل الاختبارات انهاردة ومقارنة مع النوت 9 اللي اخد نفس اللقب برضو ;) ) 🌟تحديث جوجل كروم الجديد Chrome 69 فيه حتة كدا لعنة ماشالله ع الخصوصية :O على النسخة الجديدة لو سجلت دخولك على أي خدمة من خدمات جوجل بأكونت جيميل، كروم اوتوماتيك بيخليك تسجل دخول على البراوزر نفسه، وبكدا هيسجل كل حاجة بتعملها أونلاين ويربطها بإيميلك والألعن انك لما تعمل SignOut من الخدمة، هوووب يطلعك كروم كمان.. كل ده بدون ما تعرف! 🌟مع التحديث الجديد لـ iOS 12، فيه ميزة اسمها Shortcuts خاصة بالمساعد Siri، وهو انك تقول أمر بصوتك وسيري تنفذ على أساسه مجموعة مهام أنت محددها من قبل كدا.. فيه واحد على موقع Reddit قال انه اكتشف أمر عبقري جدا مفيد لو حد بيتقبض عليه وعايز يعرف القريبين منه وهو "Hey Siri, I’m getting pulled over" ساعتها سيري بتوقف المزيكا لو شغالة، وتوطي الإضاءة ع الآخر وبتفعّل وضع Do Not Disturb عشان ميوصلكش أي اتصالات، و تتبعت رسالة لشخص انت مختاره، وهووووب تشغل الكاميرا عشان تسجل اللي بيحصل كلو! :O صباحكم فُل 😄 |
رد: نشرة S4a التقنيه 26-9
تمام معتمد يا برنس:111 (27):
|
| الساعة الآن 11:04 PM. |
Powered by vBulletin® Version 3.8.9
Copyright ©2000 - 2024, vBulletin Solutions, Inc.