المستقبل فى مصر

[MeCHoo]

بسم الله الرحمن الرحيم والسلام عليكم ورحمة الله وبركاته

فى البداية أرجو منكم سعة الصدر والهدوء والرد بموضوعية وواقعية على المشكلة المطروحة واسف لان الكلام هايطول شوية..

أنا جاى انهاردة اتكلم فى مشكلة اكيد مش جديدة خالص ولا اول مرة تسمعوها هى تقريبا هى مشكلة 80% من شباب البلد دى الى خرج للدنيا لقى أهلو بيعلموه بالعافية يعنى هايتخرج وهايبتدى من تحت الصفر عشان يكون نفسه ومستقبله.

أنا اسمى محمد فى رابعة إعلام جامعة الأزهر قسم صحافة كنت واحد من مدمنى لعبة سلك رود من اكتر من 6 سنين عمرى مافكرت فى المستقبل ولا هاعمل ايه بعد التخرج ولا الشغل ولا الجواز ولا الكلام ده كلو ماكنتش فارقة معايا لحاد ماجه اليوم الى لاقيت نفسى فيه خلاص فاضل كام شهر وهاتخرج واخد الشهاده الى مالهاش اى 30 لازمة فى الحياة العملية يعنى انت هاتجبها من الصفر تانى وتتعلم من جديد زى زيك بقيت خريجين الجامعات الى بالألافات بيتخرجو كل سنة اها صح عايز اقولكو على حاجة ( مافيش حاجة اسمها كلية قمة والهبل ده السؤال مش انت خريج ايه السؤال هو انت اتعلمت ايه؟ ) نرجع للمهم دلوقتى انا على أعتاب التخرج من الجامعة وبعد كده الجيش وبعد كده اتصدم بالواقع طبعا دلوقتى هايطلع واحد ويقولى وحضرتك قرفنا ليه ماتشتغل فى مهنتك الإعلام زى بقيت خلق الله هاقولو اهدى يامعلم كده واصبر واعرف الى فيها قبل ماتتعصب عليا أنت عارف انا لو أشتغلت فى الصحافة هايدونى كام فى الشهر؟ ولا مليم طبعا مش مصدق صح؟ والله دى الحقيقة زى المحامى كده بظبط الى بيتخرج يروح يتمرن ويدفع فلوس من جيبه عشان يتعلم وهنا بقا مربط الفرس دلوقتى انا او اى شاب زيى محتاج 3 سنين شغل عشان ياخد خبره ويبتدى يقبض ده اصلا لو لقى المكان الى يرضى يعلمه ويصبر عليه طب تعالى نحسبها كده .. تخرج من الجيش 24 سنة وعليهم كمان 3 سنين شغل =27 سنة وانت لسه محوشتش جنيه يوحد الله ده لو ماكنتش مديون حلو لحد كده ؟ وتبدء بقا بعد كده تاخد ملاليم فى ملاليم لحاد مامرتبك يزبط أنشاء الله على التلاتين .. واحد يقولى طب ماتشتغل call center مثلا او sells وهتاخد اول مرتب 1200 جنيه وانت خريج إعلام يعنى تنفعهم أقولو اشطة وانا معاك يابرنس بس تعالى قولى كده لو أشتغلت شغلانة من الأتنين دول بعد 10 سنين هبقا ايه؟! ها؟ قولى انت بئا مانا اكيد مش هاعيش طول عمرى call center يعنى وهى دى ياجماعة مشكلتى والى نفسى الاقى ليها حل وبجد تعبت تعبت من كتر التفكير وشكلى داخل على أكتئاب نفسى.
الخلاصة : لو أشتغلت فى مهنتى عايزلى 15 لـ 20 سنة عشان اكون نفسى واجيب شقة وافرشها واجوز وكل الهم ده والرقم حقيقى على فكرة واكيد انتو عارفين ولو اشتغلت شغلانة من بتوع اليومين دول الى كل الشباب بيشتغلوهم اها هاقبض وهاجهز نفسى على التلاتين او 32 بالكتير وهاتجوز ودى حقيقة بس هايكون ضاع مستقبلى وافضل طول العمر داير فى الساقية وزيى زى اى حد تانى وماليش قيمة حقيقة فى المجتمع.

أسف بجد على الأطالة ومستنى ردودكو وشكرا مقدما

[HandSome]

للاسف هى دى مصر

انا رأيى تمشى فى الطريقين
تشتغل فى اى شغلانة لحد ما الوضع يتحسن
و تاخد الخبرة وتشتغل فى مجالك

ربنا معاك و يسهلك الحال

[_Joo]

انا عن نفسى بفكر اكمل معهد و نفس الوقت ادخل الجيش بتاعى (عصفورين بحجر واحد ) و بعدها احاول اسافر ف اى مصيبه تاخدنى بعيد عن مصر لان مصر ام الدنيا اظن من اول ما اتولد و هوا بيقولولى كدا بس فين الفعل لايوجد ف ان شاء الله هسافر ادعو انتو بس