[mega2000x]

ياريس اولا الف شكر على الموضوع , ثانيا انت ذكرت كل المزايا الفرعية فقط اللى بتبقى مجرد اضافات للى حيشترى الجهاز , فى الاول و فى الاخر هدف اللى حيشرى الجهاز هو الالعاب , بداية انا عندى الجهازين و فيه بس كام نقطة عاوز اوضحهم :

1 - انت ممكن تتصل بالنت من خلال وصلة ال Ethernet ودى اساسا موجودة فى الجهازين , و بالعكس وصلة الوايرلس بتأثر على سرعة الاتصال و انت بتلعب و خصوصا فى PS3

2- الاكس بوكس بييجى معاه اساسا هارد ديسك بتختلف مساحته حسب النوع 120 جيجا و 250 جيجا و 320 جيجا , و بيتركب فى الجهاز من الجنب و ماتحسش اساسا انه خارجى و شكله بيكون مدمج مع الجهاز , و برضه فى خاصية تنزيل الالعاب من ال Marketplace زيه زى ال PS3

3- بالنسبة لخاصية الاستشعار دى اساسا استخدامها قليل جدا و لو تم استخدامها فى العاب بيكون فى حاجات فرعية فى اللعبة , من ناحية تانية الاكس بوكس بيمتاز بوجود جهاز Kinect له وده لو تعرف بتستخدم جسمك كله عشان تتحكم فى الالعاب و الجهاز بيحاكى حركة جسمك و تحس انك جوه اللعبة و ماتحتجس للذراع اساسا فى العاب Kinect اللى بتزيد كل يوم و طبعا مفيش اى مقارنة بينه وبين PS3 Move لأن PS3 Move بيشبه تحكم ال Wii أكثر ,على خلاف كينيكت اللى مش بتحتاج فيه غير جسمك بس للتحكم

4 - بالنسبة للاونلاين ايه موضوع 10 ساعات ده مش فاهم قصدك ؟؟؟ اونلاين Xbox360 هو اه باشتراك شهرى , لكن روعة فوق الوصف و يتفوق بمراحل على اونلاين PS3

5- بالنسبة للخصائص الاخرى اللى انت ذكرتها للجهازين , زى ما قلت قبل كده كلها حاجات فرعية مش حتأثر نهائيا فى الرغبة فى شراء جهاز فيهم لأنها بكل بساطة تعتبر ملحقات اضافية


نيجى بقى للى يهم الشخص اللى حيشرى اى جهاز فيهم :

أولا : مزايا و عيوب PS3

1 - الحصريات , حصريات PS3 لا منافس لها على الاطلاق , و هى السبب فى ان كثير بيشتروا الجهاز , و من اشهر الحصرياات دى :Metal Gear Solid 4 , God of War 3 , Uncharted 1 ,2 ,3 و غيرها كثير

2- جهاز PS3 له طابع خاص عند الناس لأن هو تقريبا جهاز الالعاب الاول المتعارف عليه بين الناس من ايام PS1 فدى لوحدها بتشد ناس كثير انها تميل له

3 - من عيوبه انك لازم تشتريه باكيبر مساحة هارد على قد ما تقدر يعنى 160 جيجا او 320 جيجا , لأن فيه عيب , و ه ان معظم العاب بتحتاج تثبت جزء منها اجبارى على الهارد لما تجيى تشغلها اول مرة , عشان تقلل وقت اللودينج , و بالرغغم من كده وقت اللودينج فى العاب PS3 هو نفس وقت اللودينج فى العاب Xbox360 و عشان كده ده يعتبر عيب فى PS3

4-و النقطة دى ذكرها PUFFY , وهو ان الجهاز هادى جدا اثناء اللع و مايتعبش الاعصاب زى ال Xbox360

5- يمكن تعديل الجهاز سوفتوير و بدون حاجة لفتح الجهاز من خلال انزال Custom Firmware بدل ال Official Firmware من سونى , و ميزته انه بيسمح بتشغيل الالعاب من الهارد الداخلى او من خلال هارد USB خارجى , و لكن لا يمكن تعديل الا الموديلات القديمة اللى عليها فيرموير 3.55 او اقل , لكن الموديلات اللى عليها فيرموير اعلى لا يمكن تعديلها حاليا

6- الجهاز ممكن تشتريله ملحق اسمه PS3 Move وده شبيه بذراع تحكم ال Wii و له بعض الالعاب المتوافق معها او اللى تم اصدارها مخصوص عشان تشتغل معاه

7- الاونلاين فيه مجانى , يعنى يادوب تدخل و تلعب اونلاين مع صحابك بدون الحاجة لأى اشتراك

ثانيا : مزايا و عيوب Xbox360

1- حصريات ال Xbox360 مش بنفس جودة حصريات PS3 , لكن ده مايمنعش ان الاكس بوكس له حصريات روعة زى سلسلة Gears of War و سلسلة Fable

2 - معظم الالعاب اللى بتكون موجودة على الجهازين , الجرافيك بتاعها بيكون افضل فى الاكس بوكس , ماعادا الحصريات , حصريات PS3 تعتبر صاحبة اعلى جرافيك على الجهازين

3- الالعب مش بتحتاج انها تثبت اى حاجة على الهرد على خلاف PS3 و دى ميزة للجهاز

4- مروحة الجهاز صوتها عالى و مزعج , لكن لو فى غرفة واسعة الصوت مش حيكون ملحوظ قوى , كمان بصفة عامة صوت اللعبة بيغطى على صوت المروحة

5- هناك طريقين لتعديل الجهاز , واحدة سوفتوير وواحدة هاردوير , و فى الطريقتين لازم الجهاز يتفتح , طريقة السوفتوير بتتمثل فى تثبيت سوفتوير اسمه LT و اخر نسخة منه حاليا هى LT 3.0 و التعديل ده عيبه انك لازم تنسخ الالعاب على اسطوانات و تلعبها من الاسطوانات دى و تلعب اونلاين بدون مشاكل , التعديل الثانى و ده اسمه Jtag او RGH و ميزته انك تقدر تلعب الالعاب من على الهارد سواء داخلى او خارجى بدون اسطوانات بالاضافة لمزايا كتيرة جدا مش موجودة اساسا على الاكس بوكس الاصلى ولا المتعدل LT و عيب التعديل ده فى انك ما تقدرش تلعب اونلاين

6- الاونلاين بتاعه باشتراك شهرى على خلاف PS3 ل, لكن من ناحية تانية الونلاين اروع و اكثر سلاسة من اونلاين PS3 , من ناحية تانية الاشتراك الشهرى محتاجه فقط عشان تلعب اونلاين , يعنى تقدر تتصفح النت و تدخل ال Marketplace و تشترى اللى انت عايز من غير ما تحتاج تشترك شهريا

7- الجهاز ممكن تشتريله ملحق اسمه Kinect , و ده لوحده يعتبر ثورة فى الالعاب , لأنك بتستخدم جسمك كله فى التحكم فى اللعبة , يعنى مثلا لو بتلعب مصارعة , تستخدم ايديك و رجليك فى الضرب و شخصيتك اللى جوه اللعبة حتقلد الحركات اللى انت بتعملها بالضبط



دى تقريبا المزايا و العيوب اللى فى الجهازين اللى من وجهة نظرى اكثر اهمية للى ناوى يشترى جهاز فيهم عشان يحدد موقفه , و فى النهاية الجهازين اكثر من روعة و انا عن نفسى مش بفضل جهاز فيهم عن الثانى , لكن طبعا ارجح PS3 عشان حصرياته اكيد